१२ बैशाख, काठमाडौं । नेकपा-माओवादीले आसन्न संविधानसभा निर्वाचनका लागि सरकारले सुरु गरेको नागरिकता वितरण र मतदाता नामावली संकलनमा अवरोध गर्ने भएको छ ।

माओवादी केन्द्रीय समितिको बिहीबार सम्पन्न बिस्तारित बैठकले अध्यक्ष मोहन बैद्य किरणको राजनीतिक प्रतिवेदन सुभावसहित पारित गर्दै नागरिकता वितरण र मतदाता नामावली संकलनको राजनीतिक र बैचारिक रुपमा भण्डाफोर गर्ने निर्णय गरेको छ । ‘नागरिकता वितरण नियमित प्रक्रिया भएपछि षड्यन्त्रपूर्वक मतदाता नामावलीसँग जोडिएको छ र नागरिकतासम्वन्धी विधेयकमा हाम्रो आपत्ति छ’ पोलिटव्यूरो सदस्य हरिभक्त कँडेलले अनलाइनखबरसँग भन्नुभयो-’त्यसको हामी प्रतिरोध गछौं । सरकार जुन रुपमा आएको छ, त्यसलाई हेर्दा अवरोधसम्म पनि जानसक्छौं ।’

सरकारविरुद्धको आन्दोलनलाई थप प्रभावकारी बनाउने निर्णय गर्दै बैठकले संघर्षका कार्यक्रम तय गर्ने जिम्मा पोलिटब्यूरोलाई दिएको छ ।

बैठकले सरकारविरुद्ध आन्दोलनरत दलहरुको मोर्चा बनाउने निर्णय गरेको नेता कँडेलले जानकारी दिनुभयो । थपिएका केन्द्रीय सदस्य र सल्लाहकारहरु समेतको सहभागिता रहेको बैठकमा अधिकांशले वर्तमान सरकारले गराउनु चुनाव वहिस्कार गर्नु पर्नेमा जोड दिएका थिए ।