१९ वैशाख,  काठमाण्डौ  । पछिल्लो तथ्यांकले हवाइ मार्ग हुँदै नेपाल आउने पर्यटकको संख्या घटेको देखाएको छ । त्रिभुवन अन्तराष्ट्रिय विमानस्थल अध्यागमन कार्यालयको तथ्यांक अनुसार यो वर्षको अप्रिल महिनामा हवाई मार्ग हुँदै नेपाल आउने पर्यटकको संख्या अघिल्लो वर्षको सोही महिनाको तुलनामा ८.९ प्रतिशत कम छ । तथ्यांक अनुसार अप्रिल महिनामा ५४ हजार १ सय १९ जना विदेशी पर्यटक हवाई मार्ग हुँदै नेपाल आएका छन् ।

कार्यालयका अनुसार अप्रिल महिनामा गतवर्षको तुलनामा सार्क क्षेत्रका पर्यटक सबैभन्दा घटेका छन् । अघिल्लो वर्षको अपि्रल महिनामा भन्दा सार्क क्षेत्रबाट २१.६ प्रतिशत कम पर्यटक नेपाल आएका तथ्यांकले देखाएको छ । अप्रिलमा भारतीय पर्यटकको आगमन सबैभन्दा बढिले अर्थात् २५.३ प्रतिशतले घटेको छ जबकी बंगलादेशबाट आउने पर्यटकको संख्या भने अघिल्लो वर्षको अप्रिलको तुलनामा झण्डै १७ प्रतिशतले बढेको छ ।

तथ्यांक अनुसार अपि्रल महिनामा चिनबाट आउने पर्यटकको संख्या अघिल्लो वर्षको सोही महिनाको तुलनामा २६.६ प्रतिशतले बढेको छ । त्यस्तै मलेसिया, थाइल्याण्ड, अस्ट्रेलिया लगायतका देशबाट हुने पर्यटक आगमन बढेको छ भने जापान, दक्षिण कोरिया, सिंगापुर तथा युरोपेली पर्यटकको संख्यामा पनि कमी आएको छ ।

अध्यागमन कार्यालयका अनुसार अपि्रल महिनामा अन्तराष्ट्रिय विमानस्थलबाट ६६,१०७ जना विदेशी पर्यटक बाहिरिएका छन् । यो महिनामा ६२,४८८ जना नेपाली भित्रिएका र ७५,३२३ जना नेपाली बाहिरिएका तथ्यांकले देखाएको छ ।